ሙስና ግን ይጣፍጣል እኮ¡
ወቅቱ የትንሳኤ በዓል ዋዜማ ነበርና አንዱ የድርጅታችን ደንበኛ የነበረ ዕቃ አቅራቢ (ነጋዴ) ለኃላፊያችን የምግብ ቅቤ ይዞላቸው ይመጣል፡፡ ነጋዴው ኃላፊያችንን ከቢሮአቸው ያጣቸዋል፡፡ እንዲያው ስገምት ሁለቱ የቢሮአችን ፀሐፊዎቻቸው ያልተረከቡት ሆነ ብለው እኔ እንዳውቅ (እንዳየው) ስለፈለጉ ይመስለኛል፤ ይህ የሆነው እኔና ኃላፊያች በስራም በባህርይም የማንግባባ ይልቁንም አንዳችን የሌላችንን ስህተት አድፍጠን የምንጠባበቅ ሰዎች ስለነበርን ይመስለኛል፡፡ በዚያ ላይ ኃላፊያችን ከሁላችንም ጋር ፀብ ያለሽ በዳቦ አይነት ጨዋታ ላይ ነበሩ፡፡ እናም ፀሐፊዎቹ ”እኛን ስለማያምኑን ፍፁም ቢሮ ሂድና ስጣት፤ እሷ ትሰጥልሀለች” ይሉታል፡፡ ቅቤውን ዝም ብዬ ተቀብዬ ልሸኘው አልወደድኩም ነበርና ትንሽ ተጨዋወትን፡-










